For teachers and young people from nursery to university

Scuilwab - leuk efter yer leid

Ninian's Way, Isle of Whithorn

Angela Blacklock-Brown his sent in this braw poem for awbodie tae think on. The sense o place in it is gey strang.

Ninian's Way, Isle of Whithorn

At the back end o hairst
atween Lammas an Martinmas
Solway watters heeze an hurl
an skelp the craigs
Sea gusts pirl pebbles,
sook shingle frae the strand.

Yon wind is illkyndit
It wallops air, gress an
the hair o a wumman
glowerin oot ower he sea.

Aside the sate,
scrieved on stane
sieven names.

'Did ye ken them?' she says,
'Aa young yins, aa freens,'

'The sea gies an taks,
gies an taks.
Twa sons an a nephew.'

Ah nod an turn tae
the chaipel wrack...

Ninian landit on thon strand,
lowned the jaws, merked
brochs on the saund.

Crummock in haund
he gaithered fairmers an
fishers tae the faith.

Yon winter wus
a tide ower far
tae stell the watters.

Angela Blacklock-Brown (August 2011)

Stertin Oot

Readers stories

Sangs, stories, ploys an puzzles for early years an new Scots lairners.
Read thaim noo»

Teachers' area

Teachers area

PooerPynts,ideas tae get stertit an ither yissfae resources. mair»